نامي ما بين حروفْ عشقاني

نامي ما بين حروفْ عشقاني
(باللهجة اللبنانية)

(

1)
الله خَلَقْ هالْكَوْنْ شُعلة نورْ
والنورْ حُلْمُ الناسْ كُلُّو سْرورْ
لا تزعلي منشانْ ماتصيرْ الدِّنِي
دُنيةْ أسى وأحزانْ عم بتْدورْ
(2)
يمكنْ مَرَرْتِ بْجّوّْ مَلْيانْ بْوَجَعْ
والهَمّْ كانْ كبيرْ صعبي يِنْبَلَعْ
خايفي مْنِ الغَدْرْ شي يومْ يتْكَرَّرْ
وعندكْ رُعُبْ من قلْبْ يتحرَّرْ
وعندك بعقلِكِ صار عم يكبرْ فَزَعُ
(3)
عم تهربي ل...وينْ من خطّ القَدَرْ؟
ما بتقدَري تايْكونْ قلبكْ من حَجَرْ
عيدي النظرْ يا حلوتي عيدي النظَرْ
يالله افتحي الشبّاكْ تايْطُلّْ القمَرْ
(4)
شو الفايدي من صومْ من دون الصَّلا؟
وشو الفايدي من آخْ بِتْزيدْ البَلا؟
وحدو الأملْ بيزيدْ أوصافِكْ حَلا
لو زارْ قلبِكْ عِشقْ قوليلو هلا
(5)
اللي جَرحْ قلبِكْ صارْ لازِمْ تشطْبيهْ
هيدا متلْ شيطانْ لازمْ تطرْديهْ
باعِكْ بسعر رخيصْ لا تتأثَّري
من بعدْ كلّ الألمْ كِيفْ بتُذُكْريهْ؟
(6)
يِلْعَنْ أبو الماضي اللي سَبَّبْ هالجراحْ
الماضي مضى واللي راحْ راحْ
بيِكفي بِكي بيِكفي دمْعْ ونْواحْ
التفاحْ عم يُطلُبْ إذِنْ يالله وافْقي
منشانْ عاخدودِكْ يفرحْ التفّاحْ
(7)
الحُبّْ عم يْدِقّْ عا بابِكْ
لا تْسَكّْري بابِكْ
جايي ومعي مفتاحْ تايْفيقْ الأملْ
مش متلْ غيري ذيبْ يِفْتِرْسْ الحَمَلْ
جايي لأطْرُدْ مِنِّكْ الأحزانْ
وجايب معي باقة ورْدْ مع ريحانْ
تا تْبَلّْشي منِ جْديدْ
حْكايةْ أمَلْ بالعيدْ
يمْكِنْ أنا عيدِكْ
يُمْكِنْ مشْ أنا
المُهِمّ جاييكِ الهَنا
لا غَيْمْ أسْوَدْ بالسّمَا
ولا حزنْ بيجيبْ العَمى
شوفي شروقْ الشمسْ ما تشوفي الغيابْ
شوفي سرورْ القمَرْ ما تشوفي السّحابْ
شوفي الأملْ بالسَّعْدْ ما تشوفي العذابْ
شوفي جمالْ البحرْ ما تشوفي الضّبابْ
شوفي فرَحْ حسُّونْ ما تشوفي الغُرابْ
البحرْ بيموتْ لو نامتِ الموْجاتْ
وصوت الأنوثي طالبْ اللمْساتْ
وقطرْ النّدى رحْ يِنعِشْ الزّهْراتْ
الحبّْ عم يدِقّْ عا بابِكْ
يا حلوتي رُدّي
وهْمومْ لا تعِدّي
يالله الفرحْ جايي
وجايي القمَرْ حدّي
أنتِ الشمسْ والنّورْ
شو طالِتْ المُدّي
بدِّكْ هَنا وأفراحْ
ومتلِكْ أنا بدّي
بدِّكْ ليالي مْلاحْ
متلِكْ انا بدّي
وحياة عينيكِ
متلِكْ انا بدّي
رحْ طِيرْ فوقْ الغَيْمْ وتكوني معي
يِمكِنْ لَجَوّ العِشقْ بكرا بترجَعي
وحدو العِشقْ جايِبْ معو أخبارْ
إنّو الأملْ موجودْ لازمْ تسمعي
شوفي الدِّني بالوَرْدْ مَلْياني
شوفي الفَضا عْصافيرْ وغْناني
شوفي البحرْ أمواجْ نعساني
شوفي السَّمَا ونجومْ سهراني
شوفي الفَرَحْ موجودْ في بيت القصيدْ
ونامي ما بين حْروفْ عشقاني !!!
******************************
ح.إ.ر

» نامي
» نامي في عيوني