يسعد مساكِ

يسعد مساكِ ( باللهجة اللبنانية )



(1)

الله معِكْ

يسعدْلي مساكِ

ما أبشعْ الأوقاتْ

لو كانتْ بلاكِ

طابْ السهَرْ بحروفْ عم ترْشحْ عسَلْ

وطاب الحكي بكِلْماتْ بتوزّعْ أمَلْ

وطاب الخمرْ من همسْ دافي يا ملاكي

الله جميلْ

وقالْ بِحِبّ الجمالْ

وأنتِ الجَميلة مْتوّجة بعرش الجمالْ

والله جمالِكْ صارْ بحدود الكمالْ

وترسُمْ عشكلِكْ صعبْ ريشات الخيالْ

يمكنْ يقول البعضْ عم بالِغْ كتيرْ

ويمكنْ يقول البعضْ مجنون عقلو زغيرْ

رحْ قدِّمْ عيوني عالصُّبْحْ بكّيرْ

وقدِّمْ سمَعْ يسمعْ كلام كبيرْ

يمكنْ إذا شافوكِ بيعذروني

يمكنْ إذا سِمعوكِ بيرحموني

مجانينْ بيصيروا

وعشّاقْ بيصيروا

ورحْ يرجعوا يقولوا

كانْ عندَكْ حقّ

معذورْ قلبكْ دقّ

ال...بيشوفْ وبيسمعْ

معذور لو يركعْ

معذورْ لو يخشعْ

الله معِكْ

ويسعدلي مساكِ

ما أبشعْ الأوقاتْ لو كانت بلاكِ

مش بسّ رحْ حِبّكْ

بالإذنْ من ربِّكْ

رحْ أعبُدْ سماكِ

*******************************

شاعر الأمل حسن رمضان - لبنان