وضعِكْ صعبْ

وضعِكْ صعبْ (باللهجة اللبنانية
**********************
وضعِكْ صعبْ
والله صعبْ
وجْبالْ ما بتتحمّلو
والناسْ شو بتظلُمْ ؟
ما بيعرفو الحقيقة
وما بيعرفو إنّكْ غريقة
وما بيعرفو إنك بريئة
حتى سؤال زغيرْ
تا يعرفو ما بيسألو
ما بيعرفو إنكْ سجينة
وإنو لياليكِ حزينة
وإنو الدّفا مفقودْ
وإنو الأسى موجودْ
ما بيعرفو ولا بيسألو
قومي اصرخي
قوليلهن يا ناسْ
عم ذوق مُرّ الكاسْ
الإحساسْ عم ينداسْ
نهاري ألَمْ
ليلي عدَمْ
وكلّ الأسى من مُحترمْ ؟
بحلمْ يجي شي نهارْ
حامل معو أزهارْ
وإسمعْ كلام جديدْ
ويقول أنتِ العيدْ
أنتِ الأملْ بالدّارْ
هيدا الحلُمْ
بعدو حُلُمْ
وباقي الأسى من مُحترمْ ؟
قومي اصرخي وتْمرّدي
وما تقبلي تتهدّدي
وموقف كرامي حدّدي
أنتِ بشرْ
لأ مش غنَمْ ؟
أنتِ بشرْ
لأ مش صنمْ ؟
أنتِ بشرْ يا حلوتي وتجدّدي
الفرحُ ما رح يجي من دْموعْ
والبُكا ما بيخلّصكْ من جوعْ
الحلُمْ بالسّعدْ والله حلُمْ مشروعْ
والحلم طايرْ على جناح الأملْ
والأملْ يا حلوتي بدّو عمَلْ
بدّو مواقف صارمي
تا ينجح المشروعْ
يا حلوتي أنتِ بشرْ
وجهكْ ولا وجه القمرْ
شو في بعد حتى تقدّميهْ ؟
بقول اصبري
تقولي صبرتْ كتيرْ
وعم أسألكْ عن حلّ
تردّي ما عندي حلّ
والحلّ بالتدبيرْ
يمكن أنا لو مطرحِكْ
كانْ يمكنْ فِلّْ
وكنت قلتلّو
حِلّْ عني حِلّْ
ما عاد فيي عيشْ
عُمري معكْ بالذّلّ
مرَّضتني
جنَّنتني
حِلّْ عني حِلّْ
نحنا اجتمعنا حْبابْ
ومنفترق أحبابْ
والبُعدْ وحدو الحلّْ
يمكن انا لو مطرحكْ
كنت بعملْ هيكْ
وبدخلْ بعُمر جديدْ
بأيامْ ومواعيدْ
وأمري لألله بسلّمو
وبحلمْ بحبّ جديدْ
لكن انا مش مطرحكْ
ومسرحي مش مسرحكْ
والناس مختلفينْ
هيدا صبَرْ
ونال القِمَمْ
وهيدا صبَرْ
ونال الندَمْ
والبعض بيغامِرْ
وبيربحْ الأيامْ
والبعضْ بيقامِرْ
وبيخسر الأحلامْ
واللي خِسِرْ كلّ شي
وما عاد عندو شي
وبالنار عم يمشي
عا شو رح يأسفْ ؟
عالظلمْ رح يأسفْ ؟
عالنَّكَدْ رح يأسفْ ؟
عالذّلّ رح يأسفْ ؟
بيتركْ ما عندو شي
يخلّيه يتأسّفْ
*****************
شاعر الأمل