يا أمي

موضوع: يا أمي الإثنين نوفمبر 03, 2008 6:33 pm

يا أمّي

يا أمّي يا حنوني سامحيني
أنا مقصِّرْ تُجاهِكْ سامحيني
مِنِّكْ يا أمّي وبْصدْقْ خجلانْ
يا ريتِكْ يا حنوني تسامحيني
أنا ما نْسِيتْ صفحاتْ الزّمانْ
يا كلمِةْ سِرّْ عُمري كلّميني
هاتي كفِّكْ الأبيضْ اللي كانْ
يْزينْ الحرارة اللي على جْبيني
شفافي اشتاقوا والقلبْ عطشانْ
وغيرْ كفِّكْ يا أمّي ما بيرويني
مالْ الدِّني والكونْ والأكوانْ
ما ببدلو بغبرة جْريكِ يا تقبريني
معقول أنسى حْكاية الإنسانْ؟
تسع شهورْ ببطنِكْ حملتيني
معقول إنسى العينْ والأجفانْ
سْهِرْتِ الليالي حتى تْغفّليني
معقول إنسى كيف مش كسلانْ
تْعِبْتِ سْنينْ حتى تْعلّميني
معقول إنسى وحشة الوديانْ
تْجيبي حطبْ منشان تحميني
من بَرْدْ كانون وثلجْ نيسانْ
ومنشانْ إدفا كنتِ تُحُضنيني
معقولْ إنسى حكاية الخيطانْ
وحكاية الإبرة حتى تْلبّسيني
معقول إنسى حكاية الأحزانْ
لمّا الجرحْ علّمْ على جْبيني
جُرْحْ زغير ومن حجر صُوّانْ
ما نِمْتِ الليلْ يا تقبريني

ولمّا كْبِرْتْ وصار عندي سْنانْ
زْرَعْتِ بعقلي فكر يعطيني
قيمي كبيري بعالم الإنسانْ
فيها الكرامي تاجْ لَسْنيني
زْرَعْتِ بعقلي أْصولْ للإيمانْ
زْرعْتِ بعقلي زهورْ من ديني
زْرعْتِ بعقلي الوطنْ والأوطانْ
زْرعْتِ بعقلي الفِدا وبْشَراييني
زْرعْتِ بقلبي الحبّ للإنسانْ
وللأرضْ وزْرعْتِ البساتينِ
وما عِدْتْ من فضلِكْ انا حَيْرانْ
صُرتْ عارِفْ طريقي يا تقبريني
طريقي مستقيمي وبلا ألوانْ
طريقي العِزّْ والأرضْ الحصيني
طريقي الرّفضْ للظلمْ والطّغيانْ
طريقي التّحدّي عم تسمعيني؟
وصُرتْ ثائرْ بفضلِكْ ثورة الشجعانْ
يْخافْ الخوفْ مني يا تقبريني
ما بنسى لمّا صُرتْ عاشق وولهانْ
بِكِلْماتْ الوفا يمّي نصحتيني
قلتِ الغدرْ من شيمة الشيطانْ
وقلتِ الوفا يمّي أصلْ ديني
يا أمّي يا حنوني سامحيني
أنا مْقصِّرْ تجاهكْ سامحيني
رِضاكِ مطلبي يمّي رِضاكِ
أنا بْأمركْ يا أمّي سامحيني