حسن إ.رمضان
المشرف
عدد الرسائل : 1531
العمر : 69
العمل/الترفيه : شاعر
المزاج : رومنسي
تاريخ التسجيل : 03/10/2008
 | موضوع: كِنْتْ ماشي عا شطّ البحر(بالعامّية اللبنانية)  الثلاثاء ديسمبر 22, 2009 9:35 pm | |
| كِنْتْ ماشي عا شطّ البحرْ
كِنْتْ ماشي عا شطّ البحر تعبانْ
وحدو البحرْ ماجأْ ويْبَدِّدْ الأحزانْ
بَعْطيهْ أسراري
وبْقولْ أخباري
وحدو البحر مشهورْ بالكِتمانْ
وِقْعْ النَّظَرْ عا سِتّْ عم تبكي
سبحان ألله اللي خَلَقْ هالسِّتْ
حلوي كتير كتيرْ
قلتْ يمكنْ عروسة بحرْ
سبحان خالِقْها
مثل البدْرْ
كتل الشمسْ
عيون المَها عيونا
جفون المَسا جفونا
والورد عالخدَّيْنْ
والثغر عم يرشحْ عَسَلْ
سبحان خالقها
سْألْتْ حالي:
ليش هالسِّتْ عم تبكي؟
بْقرِّبْ لإسْألْها؟
تْرَدَّدْتْ
مالي ومالْها
وقِلْتْ لحالي:
يا صبي اتركْها هيي وحالها
وقبل ما روحْ
رفْعِتْ راسها وتطّلّعِتْ فيّي
سبحان خالِقها
وِقعْ السِّحِرْ وما عاد فيّي روحْ
عيون جذّابي
كتير جذّابي
وما عِدْتْ قادر عالحَكِيْ
وصرتْ مسحورْ
تْبَسَّمِتْ لي
قرّبْتْ وسَلَّمْتْ بالتهذيبْ
وعرَّفْتْها بحالي
ضُحْكِتْ
ما بِعْرِفْ ليشْ
سْأَلْتْها: ليش عم تبكي؟
ضِحْكِتْ
ما بِعْرِفْ ليشْ
سْأَلْتها: ليش عالبحرْ وحدِكْ؟
ضِحْكِتْ
ما بِعرفْ ليشْ
قِلْتِلّْها:
يمكن انا مزعجْ
وحاولْتْ أمشي وروحْ
قالتْ: لوينْ رايحْ؟
تعا تا خَبّْرَكْ
جْلَسْتْ حَدّْها متل ما بدّها
قالتْ:
زوّجوني وكان عمري زغيرْ
وما كنت بعرفْ شو يعني الزواجْ
وعِمْلوا عِرسْ والناسْ كانوا كْتارْ
رقصْ وغِنا ومهباجْ مع غيتارْ
كنتْ فرحانة
وكنتْ زعلانة
فْرِحْتْ بالناسْ مبسوطينْ
وزْعلتْ عا فْراقْ مدرستي
وبآخر الليلْ
صِرتْ وحدي مع حدا ما بعرفو
وصار اللي صار
وما بعرِفْ كيف والله صارْ
طِلْعْ الصُّبْحْ وكنتْ عم أبكي
تذَكّرْتْ أمّي
والله ما سَأَلْ :ليش عم تبكي؟
صرّخْ بِوِجّي
وشدّني بشَعري
وصفعني صفعتينْ
وكان متل الديبْ
كَشَّرْ عن نيابو
خِفِتْ منّو
إيه خِفْتْ منّو
ولمّا إجِتْ أمي قلتِلّها شو صارْ
قالتْ يا بنتي اصبري
اللي صارْ فيكِ اليومْ
مع أمّكْ بأوّلْ يومْ صارْ
وْصّبَرْتْ حتى الصّبْرْ مني مَلّ
وما قْدِرْتْ أتحَمَّلْ
وممنوعْ إنّو فِلّ
كانتْ حياتي معو مُرّة
تْصّوّرْ
ولا مَرّة سْمِعِتْ كلمة غزَلْ
وإجو الأولادْ
وزاد همّي وزادْ مكيالْ العذابْ
مينْ انا حتى قولْ لأ ما بدّي ولادْ؟
بِقْسُمْ بألله
ما في وَلَدْ عندي لولا الإغتصابْ
زاد البِكي وسَكْتِتْ
قِلْتِلّها: وبعدين شو اللي صارْ؟
قالتْ:
الناس بيظُنّوا إنّي سعيدي
معهم حقّ
دايماً أنا بِضْحكْ
وما بقولْ شو بيصيرْ
لكنْ ما عادْ فيّي
عندي عطشْ رحْ موتْ
مين يسقيني؟
وحدو كلام الحبّ مَيّ يرويني
هيدا اللي عندي
دايماً يجي تعبانْ
تعبانْ بدّو ينامْ
ولو صادفتْ سهرانْ
ال..تي..في بيِلْغيني
بروحْ بِتْزَيّنْ على شانو
لا بينظرْ
ولا بيحكي
وبرجعْ بخيبة املْ بعيون عم تبكي
وقبلْ ما تسألْ:
ليش عالبحرْ جايي؟
ما لْقَيْتْ غير البحرْ إحكيلو
بحاكيهْ يضْحَكْلي
بتعرفْ شو قلّلي البحر؟
قلّلي:
خلّي الأملْ موجودْ
جايي زمن الورودْ
لا تطّوّلي غيابكْ
والفارسْ الموعودْ
مكتوبْ بِكْتابِكْ
يْقِلّكْ شِعِرْ وحروفْ
ويْبَوِّسْ ترابِكْ
ويْسَكّْنِكْ قلبو
ويْشاركِكْ دربو
ويْعَوّضْ اللي راحْ من عمركْ
رحْ تفرحي من جديدْ
ويْروحْ العَطَشْ
وهمساتْ مع نغماتْ وشوية دفا
ومن يومها ناطرة اللي قال عنو البحر
وووو....وتوقفتْ عن كلّ الحكي
ونظراتها بتحكي حكي أحلى حكي
...............................................
سامحونا | |
|
