يا ريتْ بتقولي نعم يا رَيْتْ(باللهجة اللبنانية)

يا رَيْتْ بتقولي نعم يا رَيْتْ(باللهجة اللبنانية)

(1)
قِلْتِلّها يِمْكِنْ انا حبَّيتْ
وبْقلبِكْ تْخَبَّيْتْ
ومشتاقْ حتى نلتقي
ممكن عليّ تشفقي؟
يا رَيْتْ بتقولي نعم يا ريتْ
شو سرّ هالإحساسْ؟
يا غير كلّ الناسْ
لمّا بشوفِكْ على الحاسوبْ
بيخفقْ القلبْ وبحِسّ إنّي بذوبْ
وبْصيرْ عم أسْرَحْ
ما بعرفْ كيف رحْ أشرحْ
بحِسّ إنّو أنا عصفورْ
طايرْ برفقة سِحِرْ عصفورة
وفوق هالغيماتْ
مِنْألِّفْ حْكاياتْ
ومْنبعثْ الصّورة
صورة مكان جديدْ
وصورة زمان جديدْ
بالعقلْ محفورة
(2)
غازلْتْها بكِلْماتْ من قلبي
وما جبْتْ هالكلماتْ من عِلبة
ومِنْ كِتِرْ ما عانتْ
ومِنْ كِتِرْ ما شافِتْ
قالتْ كلام كبيرْ
وقرَّرِتْ صَلْبي
قالتْ:
كم بِنْتْ قبلي قلتلّها هيدا الكلامْ؟
وكم بنتْ حبّيْتْ؟
هيدا الحكي
كلّو حكي
يا رَيْتْ بقدَرْ صدّقكْ يا رَيْتْ
(3)
يِمكنْ إجا الوقتْ اللي لازم قولْ
إنّو أنا شاعر بعرض وطولْ
لكنْ أنا ما بقولْ كلمة مزيّفة
وما بغشّ حوّا وما بعمَلْ غولْ
الصدق ناموسي
والحق فانوسي
مش انا زير النِسا
ولا الكذّابْ في ثغر المَسا
أنا شفّافْ ما بْخبّي
واضحْ بحُبّي
وحياة ربّي
يمكنْ في بعض رْجالْ
ما بيحكوا الحقيقة
همّنْ غريزتهنْ
وبعد ما يشبعوا
بتولَعْ حريقة
بينسوا الحَكِي
واللي انغدَرْ فيها
بتغرقْ بالبِكي
(4)
يا حوّا
لا تعمّمي
وكاس الحقيقة تْسمّمي
الرْجالْ كالبصماتْ
والبصماتْ مختلفة
مِتلكنْ
في صنف ما بيِصْدُقْ
وفي صنف متل الفُلّ
وفي صنف رائعْ وفي صنف شائعْ
والناس مختلفينْ
لا تعمّمي
وكاس الحقيقة تْسمّمي
شوفي الوردْ
أصنافْ مشهورة
هيدا ورد جوري
وهيدا وردْ مسمومْ
نحنا البشرْ متل الوردْ
ما في فرْدْ يشبه فرْدْ
لا تعمّمي
وكاس الحقيقة تْسمّمي
(5)
الإعجابْ غير الحبّ
والحُبّ جمعْ تْنَيْنْ
الإعجابْ يبقى بعيدْ
والحبّ عمر جديدْ
الإعجابْ ما في تضحية
والحبّ كلّو تضحية
الإعجابْ بذرة حبّ
والحبّ شجرة حبّ
الإعجابْ غير الحُبّ
والحبّ جَمْعْ تنَيْنْ
........................
سامحونا

» صُدفة التقينا(باللهجة اللبنانية)
» عم يسألوني ليش حبَّيْتَكْ(باللهجة اللبنانية)
» وضعِكْ صعبْ ( باللهجة اللبنانية)
» شعشعْ قمَرْ تمّوزْ ( باللهجة اللبنانية)
» ليش زعلانة؟(بالعامّيّة اللبنانية)