صُدفة التقينا(باللهجة اللبنانية)

صُدفة التَقَيْنا والشِعرْ كان السببْ
وكان الحكي بيناتنا شِعر وأدَبْ
شو صارْ فيي بس هيك صارْ
حسّيْتْ في بيناتنا حسْبْ ونَسَبْ
وحسّيْتْ إنّي بِعرفِكْ قبل ما تِخلقي
وقلبي فتحْ بابو إلِكْ وغنّالِكْ طَرَبْ
سْمِعْتِكْ تْقولي تعا تا نسكَرْ سوا
ونشربْ خمرْ من حُبّ مش خمر العِنَبْ
قال الشرقْ إنّو الرّجُلْ مقدامْ
وحدو يْصارِحْ وهيكْ بيقولو العَرَبْ
لكنْ انا في حالتي كان الكلامْ
وحدو إلِكْ ما أجملو متل الذّهبْ
قلتِ: بحبَّكْ حُبّ شو عالي ورفيعْ
ولْقَيْتْ حالي لا حقة قلبي ال...هَرَبْ
هَرَبْ مني إلَكْ عم يطلبْ شفيعْ
وطالبْ إقامة دايمي وطالبْ نسَبْ
ما قدِرْتْ أرفضْ حُبّْ جايي من السّما
وفْرِحْتْ من ساعة ال...قلبي انصلَبْ
بحبك بحبك وبحبّ كون الكاسْ
اللي بتشربي منو وبكون الرُّطَبْ
يا طفلتي اللي الدهر فيكِ كانْ
ظلمْ وأسى ودموعْ والحال اكتئبْ
يالله معي وتغنّجي وتدّلّلي
طلْعْ القمرْ والفجرْ والحال انقلَبْ
قلبي إلِكْ يا حلوتي وعندي الأمانْ
وعندي السعادة كلّها بكلّ الرُّتَبْ
وحدِكْ سكنْتِ بالقلْبْ والله أنا
بحبك بحبك والقلبْ صوبِكْ وثَبْ
رحْ عيشْ كرمالِكْ
رحْ موتْ كرمالِكْ
أنتِ القصيدي
انتِ الوحيدي
وأنتِ الهَنا كِلّو
بِكْتُبْ شِعرْ عنّكْ وبكتُبْ أدَبْ
البحرْ ناطِرْ
والشّطّْ ناطِرْ
والموجْ ناطِرْ
والرّملْ ناطرنا
قال البحرْ: وينك يا شاعِرْنا؟
وين العروسْ اللي خَذتْها مني؟
يا بحرْ
وحياة شطّكْ
وحياة رملَكْ
وحياة موجَكْ
(...)في قلبي وما بِقْبّلْ عتبْ
جايين بكرا يا بحرْ جايينْ
صرنا سوا منبقى سوا وين العَجَبْ؟

» عم يسألوني ليش حبَّيْتَكْ(باللهجة اللبنانية)
» وضعِكْ صعبْ ( باللهجة اللبنانية)
» شعشعْ قمَرْ تمّوزْ ( باللهجة اللبنانية)
» ليش زعلانة؟(بالعامّيّة اللبنانية)
» يا دنييي(باللهجة العامية