عم يسألوني ليش حبَّيْتَكْ(باللهجة اللبنانية)

عم يسألوني ليش حبَّيْتَكْ

(1)
عم يسألوني ليش حَبَّيْتَكْ
وليش بالقلبْ هونْ خبَّيْتَكْ
ما بيعرفوا إنّي بلاكْ بْموتْ
يا نور عيني القلبْ قلَّكْ فوتْ
بمالْ الدِّنِي بالْماسْ بالْياقوتْ
ما بِبِدْلَكْ يا شِعِرْ غنَّيْتَكْ
عم يسألوني ليش حبّيتَكْ
(2)
إنتَ العُمرْ إنتَ الحُلُمْ الكبيرْ
إنتَ الرّوحْ للمجروحْ جُرح كبيرْ
سجّلْتْ روحي بإسمَكْ أنا بكّيرْ
ورْضِيْتْ كونْ سْريرْ في بيتَكْ
عم يسألوني ليش حبّيْتَكْ
(3)
شو قيمة العُمرْ لو ما إنْتْ موجودْ
ما كان عندي زهرْ ولا كان عندي وْرودْ
ولا كانْ عندي فجرْ ولا كانْ عندي حْدودْ
وعم يسألوني ليش حبّيْتَكْ
(4)
يا مهجة الرّوحْ خلّيني مَعَكْ
تمْتِمْ بصوت الزّهرْ وحدي بِسْمَعَكْ
بِفديكْ ب...روحي
يا مْبَلْسِمْ جروحي
إنْتْ خيّي
إنْتْ بيّي
ومتلْ الطّفلْ الزْغيرْ ربَّيْتَكْ
وعم يسألوني ليش حبّيْتكْ
(5)
يا تقبُرْني إنتَ الهَوا والميّ
وإنتَ حبيبي
وإنتَ الدّفا والفيّ
يا نبعْ كِلّو عاطفي وإحساسْ
يا خمرْ نادِرْ بقلبِ الكاسْ
وتاعِيشْ عمري بالقلبْ عبَّيْتَكْ
وعم يسألوني ليش حبّيْتَكْ
(6)
دِيْرْ بالَكْ حبيبي على حالّكْ
وما تطرُدْني حبيبي من خيالَكْ
تْغطّى منيحْ منشانْ ما تاخُذْ بَرْدْ
بكرا انا بْدَفِّيكْ بِجْبالَكْ
حبيبي يا حبيبي
إشتقتْ لمساتَكْ
إشتقتْ للَمْساتَكْ
إشتقتْ لبسْماتَكْ
إشتقتْ لنسماتَكْ
إشتقتْ لرسْماتَكْ
أعذرْني حبيبي
أنا العصفورة السجيني
وباب القفصْ مُقفَلْ بِسِكِّيني
حزيني أنا واللهِ حزيني
وبْناديكْ من بابِ المديني
تعا خُذني حبيبي تحت أمرَكْ
وخوذْ من عمري وزِيدْ عُمرَكْ
كِلّ اللي حولي شكّْ
لكنّكْ يقيني
يا شاعر الأملْ
قِللي شو العملْ
أنتَ حبيبي
وحدكْ بتشفيني
وعم يسألوني ليش حبّيْتَكْ
............................................
ح.إ.ر

» صُدفة التقينا(باللهجة اللبنانية)
» وضعِكْ صعبْ ( باللهجة اللبنانية)
» شعشعْ قمَرْ تمّوزْ ( باللهجة اللبنانية)
» يا ريتْ بتقولي نعم يا رَيْتْ(باللهجة اللبنانية)
» ليش زعلانة؟(بالعامّيّة اللبنانية)